Choundi Development | पुण्यश्लोक अहिल्यादेवी होळकर यांच्या ३०० व्या जयंती वर्षाच्या निमित्ताने, त्यांचे कार्य आणि जीवन देशवासियांना एका ठिकाणी पाहता आणि अनुभवता यावं, यासाठी श्री क्षेत्र चौंडीच्या (Choundi Development) सर्वसमावेशक विकासासाठी बृहत् आराखडा तयार करण्याचे निर्देश विधान परिषद सभापती प्रा. राम शिंदे (Ram Shinde) यांनी दिले. चौंडी येथील श्री क्षेत्र चौंडी विकास कार्याच्या आढावा बैठकीत ते बोलत होते. या बैठकीस जिल्हाधिकारी सिद्धाराम सालीमठ, जिल्हा परिषद मुख्य कार्यकारी अधिकारी आशिष येरेकर, उपविभागीय अधिकारी नितीन पाटील, आणि जिल्हा नियोजन अधिकारी दीपक दातीर उपस्थित होते.
प्रा. शिंदे यांनी अहिल्यादेवी होळकर यांच्या कार्याचा उल्लेख करताना म्हटले की, त्यांचे जीवन हे निःस्वार्थ सेवा, प्रशासनिक क्षमता आणि धार्मिक सहिष्णुतेचे उत्तम उदाहरण आहे. त्यांच्या कार्याचा इतिहास एकत्र करून, त्याचा वारसा आणि आध्यात्मिक धरोहर जपण्यासाठी संग्रहालयातून मांडणी केली जावी. याशिवाय, चौंडी परिसरातील पर्यटन वाढवण्यासाठी, रोजगार निर्माण करण्यासाठी आणि अहिल्यादेवींच्या कार्याला प्रेरणा देण्यासाठी विविध योजनांचा समावेश आवश्यक आहे.
चौंडी येथील विकास कार्यांमध्ये नदी पुनरुज्जीवन, जलस्रोतांचा संवर्धन आणि रस्त्यांच्या सुधारणांवर विशेष लक्ष द्यावे, असे त्यांनी सूचित केले. याबरोबरच, चौंडीच्या परिसरातील शासकीय जमिनींची पाहणी करून त्याचा नकाशा तयार करावा, अशी सूचना त्यांनी दिली. दरवर्षी ३१ मे रोजी अहिल्यादेवी होळकर यांच्या जयंतीनिमित्त चौंडी येथे मोठा उत्सव साजरा केला जातो, त्यासाठी आवश्यक कामे वेळेत पूर्ण करण्याच्या सूचना देखील त्यांनी दिल्या.
संबंधित अधिकारी यांना १० मार्चपर्यंत विस्तृत विकास आराखडा तयार करण्याच्या सूचना देण्यात आल्या. या आराखड्याच्या अंमलबजावणीसाठी मुख्यमंत्री देवेंद्र फडणवीस यांच्यासोबत एक बैठक लवकरच आयोजित केली जाईल. त्याचप्रमाणे, चालू विकासकामे दोन महिन्यांत पूर्ण करण्याचे आदेश प्रा. शिंदे यांनी दिले. चौंडीच्या विकासासाठी शासन विविध योजना राबवत आहे, आणि या योजनांचा परिणामकारकतेने पूर्ण करण्यासाठी व्यापक आराखडा तयार करणे आवश्यक आहे.
हेही वाचा:
