Karjat Jamkhed | अहिल्यानगर जिल्ह्यामध्ये गेल्या दोन दिवसांपासून अवकाळी पावसाने जोरदार तडाखा दिला आहे. गुरुवारी (ता. ३) जिल्ह्यातील विविध तालुक्यांमध्ये अचानक आलेल्या या पावसामुळे शेती आणि फळबागांचे मोठे नुकसान झाले आहे. या नैसर्गिक संकटामुळे बळीराजा पुन्हा एकदा अडचणीत सापडला आहे. (Karjat Jamkhed)
जिल्ह्यातील अहिल्यानगर, पारनेर, नेवासा, श्रीगोंदा, कर्जत, जामखेड, शेवगाव, पाथर्डी, राहुरी आणि संगमनेर या तालुक्यांमध्ये अवकाळी पावसाचा अधिक प्रभाव जाणवला. जोरदार वाऱ्यामुळे अनेक ठिकाणी झाडे उन्मळून पडली, तर काही घरांचेही मोठे नुकसान झाले आहे. अचानक आलेल्या या संकटामुळे शेतकऱ्यांमध्ये भीतीचे वातावरण निर्माण झाले आहे.
या अवकाळी पावसामुळे रब्बी हंगामातील गहू, कांदा, टोमॅटो, वाटाणा यांसारख्या तयार पिकांचे मोठे नुकसान झाले आहे. काढणीला आलेली पिके पाण्यात गेल्यामुळे शेतकऱ्यांचे मोठे आर्थिक नुकसान झाले आहे. त्याचबरोबर भाजीपाला पिकांचेही मोठे नुकसान झाले आहे. फळबागांनाही या पावसाचा मोठा फटका बसला आहे. आंबा, डाळिंब, द्राक्ष, लिंबू आणि पेरूच्या बागांमध्ये फळे गळून पडल्याने उत्पादनात घट येणार आहे. प्रशासनाच्या प्राथमिक अंदाजानुसार, जिल्ह्यातील सुमारे ५० गावांमधील शेती आणि फळबागांना या अवकाळी पावसाचा फटका बसला आहे.
संगमनेर तालुक्यात वीज पडून दोन गायी दगावल्याची दुर्दैवी घटना घडली आहे, तसेच एका घराची भिंत कोसळली आहे. गेल्या दोन दिवसांतील पावसामुळे जिल्ह्यातील सुमारे अडीच हजार हेक्टरहून अधिक क्षेत्रातील पिकांचे नुकसान झाल्याचा प्राथमिक अंदाज प्रशासनाने वर्तवला आहे. यामध्ये गहू, कांदा, टोमॅटो, वाटाणा आणि भाजीपाला या पिकांबरोबरच आंबा, डाळिंब, द्राक्ष, लिंबू, पेरू या फळबागांचाही समावेश आहे.
या अवकाळी पावसामुळे वातावरणात काहीसा गारवा निर्माण झाला असला तरी, शेतकऱ्यांसाठी हे संकट मोठे आहे. वादळी वाऱ्यामुळे आणि गारपिटीमुळे आंबा, द्राक्ष आणि संत्रा या फळपिकांचे मोठे नुकसान झाले आहे. संगमनेर, कर्जत, पारनेर आणि अकोले तालुक्यांमध्ये या पावसाचा आणि गारपिटीचा अधिक फटका बसला आहे.
अनेक गावांमध्ये झाडे पडल्यामुळे वीजपुरवठा खंडित झाला होता, त्यामुळे नागरिकांना गैरसोयीचा सामना करावा लागला. पहिल्या दिवशी संगमनेर तालुक्यातील १३ गावांमधील १ हजार ४८८ शेतकऱ्यांच्या ६७७ हेक्टर क्षेत्रातील पिकांचे नुकसान झाले. कर्जत तालुक्यात २० गावांमधील ५३ शेतकऱ्यांचे १३.८३ हेक्टरवरील नुकसान झाले, तर अकोले तालुक्यातील ४ गावांमधील २२० शेतकऱ्यांचे ७२ हेक्टरवरील पिके आणि फळबागांचे नुकसान झाले आहे. पारनेरमधील एका गावातील २५९ शेतकऱ्यांच्या १२८.१० हेक्टरवरील पिकांचे नुकसान झाले आहे. नगर तालुक्यातील दोन शेतकऱ्यांचे १ हेक्टर क्षेत्रातील नुकसान झाले आहे.
जिल्हा आपत्ती व्यवस्थापन अधिकारी डॉ. वीरेंद्र बडधे यांनी दिलेल्या माहितीनुसार, हवामान विभागाने अहिल्यानगर जिल्ह्यात आणखी दोन-तीन दिवस अवकाळी पावसाची शक्यता वर्तवली आहे. त्यामुळे नागरिकांनी आणि विशेषतः शेतकऱ्यांनी अधिक काळजी घेण्याचे आवाहन करण्यात आले आहे. वादळी वाऱ्यासह पाऊस झाल्यास विजेची शक्यता अधिक असते, त्यामुळे सुरक्षित ठिकाणी आश्रय घेण्याचे आणि शेतात काम करणे टाळण्याचे आवाहन प्रशासनाने केले आहे.
हेही वाचा:
• खर्डा अपघातातील जखमी दुचाकीस्वाराचा मृत्यू; पोलिसांवर आंदोलनाचा इशारा
