Sandalwood Smuggling | जामखेड तालुक्यातील जवळके येथील एका घनदाट जंगलातील चंदनाची तस्करी उघडकीस आली आहे. वनविभागाने बुधवारी या ठिकाणी छापा टाकला आणि ३५ गोण्या चंदनाचा साठा तसेच इतर मुद्देमाल जप्त केला. या प्रकरणी काका वर्धमान वाळुंजकर या आरोपीला अटक केली असून त्याच्यावर वनविभागाच्या कायद्यांतर्गत गुन्हा दाखल करण्यात आलेला आहे.
माहिती मिळाल्यानंतर वनविभागाच्या पथकाने चंदनाची तस्करी करणाऱ्यांवर कारवाई करण्यासाठी जवळके परिसरात छापा टाकला. यासाठी उपवनसंरक्षक धर्मवीर सालविठ्ठल यांच्या मार्गदर्शनाखाली राहुरीचे सहायक वनसंरक्षक गणेश मिसाळ व वनपरिक्षेत्र अधिकारी मोहन शेळके यांचे नेतृत्वाखाली एक विशेष पथक तयार करण्यात आले. पथकाने सुरुवातीला बनावट गिऱ्हाईक पाठवून माहितीची खात्री केली आणि नंतर चंदनाच्या साठ्यासाठी छापा टाकला.
छाप्यात ३५ गोण्या ढलप्या व सालपट, चंदनाचा एक तुकडा (१.४ किलो वजन), वाकास, तराजू, एक मोबाईल आणि एक मोटारसायकल अशी विविध वस्तू जप्त करण्यात आली. या मुद्देमालासह काका वर्धमान वाळुंजकर या आरोपीला ताब्यात घेत त्याच्यावर भारतीय वन अधिनियम १९२७ चे कलम ४१, ४२, ५१, ५२, ६९ तसेच महाराष्ट्र वननियमावली २०१४ चे नियम ३१५५ अंतर्गत गुन्हा नोंद करण्यात आला. न्यायालयात हजर केल्यानंतर आरोपीला दोन दिवसांची वनकस्टडी सुनावण्यात आली आहे.
वनविभागाच्या अधिकाऱ्यांनी या प्रकाराबद्दल अधिक माहिती दिली आणि पुढे असे काही घडल्यास अथवा नागरिकांना चंदन तस्करी संदर्भात काही माहिती असल्यास कर्जत व जामखेड वनपरिमंडळाच्या कार्यालयाशी संपर्क साधण्याचे आवाहन केले आहे. यामुळे जामखेड तालुक्यात चंदन तस्करी करणाऱ्यांवर वनविभागाने कठोर कारवाई करत अन्य तस्करांमध्ये एक कडक संदेश दिला आहे.
हेही वाचा:
• आज ‘या’ पाच राशींचे अपूर्ण काम होणारं पूर्ण, आर्थिक लाभाचीही शक्यता, वाचा आजचे राशिभविष्य
• शेतकऱ्यांनो आता 1880 पासूनचे जमिनीचे उतारे पाहा मोबाईलवर, फक्त ‘या’ सोप्या स्टेप्स करा फॉलो
